FIFA重罰　防線告急 巴塞企硬上訴

巴塞隆拿被國際足協（FIFA）翻舊賬，因為簽未夠秤球員違例被重罰，今年夏天同出年1月冬季轉會市場都唔可以買人。咁大件事巴塞梗係即刻上訴，不過喺仲未知結果之前，巴塞要做定最壞打算，到時佢哋嘅後防線會成為重災區，後衞同門將都嚴重缺人。FIFA喺07年開始訂立球會收購未夠18歲球員嘅條例，要收購未夠秤球員就要符合3大條件先得，包括轉會球員要夠16歲、父母要喺新球會所在國家工作、同埋球員屋企距離訓練基地50公里內。巴塞喺09至13年一共簽咗10位小將觸犯條例，因此被FIFA重罰。
巴塞球會喺周三即刻發表聲明，表示就禁制令會提出上訴，有必要嘅話甚至會告上國際體育仲裁法院。

[img]http://static.apple.nextmedia.com/images/apple-photos/apple/20140404/large/aa0401c.gif[/img]

[b]V V、佩奧爾季尾走人[/b]
雖然巴塞喺今季仲叫緊3飛，有機會贏西甲、歐聯同西班牙盃，但球隊陣容要喺季後大執亦已經係不爭事實。中前場現階段都仲叫做夠人，加上就算禁制令生效，球會仍然可以回收借將（見附表），保贊同迪路菲奧等球員喺下季返去幫手。後防線問題似乎就大啲，隊長佩奧爾喺上個月公開宣佈會喺季後離開，而因傷提早收咧嘅門將域陀華迪斯（VV），更一早已經講明今季約滿之後就走人，如果後防線有出冇入，球隊方面都幾頭痕。
巴塞原本已經搵咗門將接班人選，同慕遜加柏門將達史特根傾掂數季後約滿過檔。𠵱家搞壇咁嘅嘢，交易隨時泡湯。達史特根經理人喺周三回應話：「暫時我哋可以睇定啲先，睇吓巴塞下一步會點做，不過達史特根喺今季後一定會離隊。」達史特根本人亦都話未知確實情況會點，但肯定嘅係一定會季後走人。

[b]車仔曾上訴成功[/b]
巴塞今季後防唔穩，除咗成日傷嘅碧基之外已經冇獨當一面嘅中堅，另一邊廂又盛傳丹尼爾會被賣走；門將位置更水深火熱，域陀華迪斯如果堅持要走，咁可能要由38歲嘅賓度擔大旗，聽到都驚。
不過，巴塞又唔使太悲觀，近年有唔少球會都因為觸犯轉會規例，被罰某段時間禁止收購球員，車路士同羅馬都中過招，其中車路士喺09年被罰，但上訴得直所以冇事。

[img]http://static.apple.nextmedia.com/images/apple-photos/apple/20140404/large/1396549350_612e.gif[/img]


來源:蘋果日報網站